ဂျူးဇာတ်ကောင်များက ဩဇာရှိသည်။

သူတို့သည် ဖတ်သူကို လှုပ်နိုးနိုင်စွမ်း မြင့်မားလွန်းလှသည်။

AUDIO

ဂျူး ဝတ္ထုတွေ များများ မဖတ်ဖူးပါ။ ဂျူးနဲ့လည်း ရင်းနှီးမှု မရှိပါ။ ဆရာမ ဂျူးနှင့် အပြင်မှာ ဟောပြောပွဲတွေကို အကြောင်းပြုပြီး တစ်ကြိမ်၊ နှစ်ကြိမ် ဆုံတွေ့ဖူးခြင်းမှ လွဲ၍ တခြား မရှိပါ။ သို့သော် ကျနော့်ပတ်ဝန်းကျင်မှာ ဂျူး ပရိတ်သတ်တွေ ဒုနဲ့ဒေး ရှိသည်။ ဂျူးဝတ္ထု နှစ်အုပ်၊ သုံးအုပ်ကို ကျနော် ရီဗျူးရေးဖူးသည်။ အညွှန်းဆိုလျှင် ပိုမှန် မည်။ အခုတော့ ဂျူးကို ရီဗျူးလုပ်ရလိမ့်မည်။


ဂျူးသည် ကျနော်နှစ်သက် သဘောကျရသော အမျိုးသမီးများ စာရင်းတွင်၊ ထိပ်ဆုံးက ပါသည်။ ဂျူးရဲ့ ကလောင်ကို ချစ်သည်။ ဂျူးရဲ့ အရေးအသားကို မြတ်နိုးသည်။ ဂျူး၏ ဖွဲ့နွဲ့မှုကို ခုန်မင်သည်။ ဂျူး၏ ခံစားချက် များကို ပုံဖော်တူးဆွကြည့်သည်။ ဂျူးစာအုပ်အများအပြားကို တစိုက်မတ်မတ် မဖတ်ဖြစ်။ သို့သော် ရံဖန်ရံခါ ကောက်ကိုင်လေ့ရှိသည်။ ကျနော်ကိုယ်တိုင် ခံစားချက်များဖြင့် မအပ်စပ်လို့လည်း ဖြစ်ကောင်းဖြစ်နိုင်ပါသည်။

ဂျူးအကြောင်း ရီဗျူးရေးခြင်း၌ အချက်အလက်များ ပါမည် မဟုတ်ပါ။ ဂျူးအပေါ် ကျနော် ခံစားမိသလို ရေးသား ခြင်းသာ ဖြစ်ပါသည်။ ဂျူးအပေါ် ဆိုတာထက် ဂျူးအရေးအသားအပေါ်မှာ ကျနော် ခံစားမိသည်ဟု ပြောလျှင် ပို မှန်ပါလိမ့်မည်။ ဂျူးနှင့် ကျနော် အသက်ကွာသည်။ ကျနော်က လူငယ်။ ဂျူးက လူကြီး။ ရင့်ကျက်တည်ငြိမ်သော အမျိုးသမီး။ ဂျူးက လောက်လောက်လားလား။ ကျနော်က ချာတိတ်။

ဂျူးအကြောင်းရေးဖို့၊ ကျနော့်အတွက် ဝေးကွာလှပါသည်။ နယ်ပယ်အရ၊ အသက်အရွယ်အရ၊ ဝန်းကျင်အရ၊ တွေ့ထိဆက်ဆံမှုအရ…. ဘာဆိုဘာမှ မနီးစပ်ပါ။ ထို့ကြောင့် ခပ်လှမ်းလှမ်းကနေ ကြည့်ပြီး၊ မြင်သလို ပြောမိပါ သည်။

ဂျူးကို ကျနော် လေးစားသည်။ လေးစားရသော အကြောင်းအရင်းများလည်း ရှိသည်။ ပထမအကြောင်းမှာ၊ ဂျူး၏ အရေးအသားများကြောင့် မြန်မာအမျိုးသမီးများ စိတ်ဓာတ်ပိုင်းဆိုင်ရာ ခိုင်မာသန်စွမ်းလာမှုဖြစ်ပါသည်။ ဂျူးဇာတ်ကောင်များက မြန်မာအမျိုးသမီးများအပေါ် လွှမ်းမိုးမှု ရှိသည်။ ဂျူး၏ ဇာတ်အိမ်ဖွဲ့စည်းမှုမှာ၊ ပညာနယ် နှင့် ကင်းလှသည် မဟုတ်။ ဂျူးသည် တက်ကျမ်းရေးဆရာ မဟုတ်။ သို့သော် ဂျူးကြောင့် အမျိုးသမီးတော်တော် များများ ရှေ့တိုးဝံ့လာသည်။ ရဲဝံ့လာကြသည်။ လုပ်ရည်ကိုင်ရည် ရှိလာကြသည်။ အမှီအခိုပြုတတ်သော သတ္တဝါ ဘဝမှ လွတ်မြောက်လာသည်။ ဂျူး၏ စာအုပ်များက အမျိုးသမီးထုအပေါ် ဆင့်ကဲပြောင်းလဲမှုဖြင့် တွန်း ပို့ ရှေ့ရောက်စေခဲ့သည်။

ကိုယ့်အားကိုယ်ကိုးတတ်သော အမျိုးသမီးများဖြစ်လာစေသည်။ ပီပြင်သော ဘဝရည်မှန်းချက်ကို မဆုတ်မနစ် ကြိုးစားသည့် အမျိုးသမီးများဖြစ်လာကြသည်။ အားငယ်မှု၊ သိမ်ငယ်မှုများက ဖောက်ထွက်ရုန်းထနိုင်သော အမျိုးသမီးများဖြစ်လာကြသည်။ အမျိုးသားယောက်ျားများအပေါ် တုန့်ပြန်ချေပနိုင်စွမ်းရှိသော ဉာဏ်ရည်သတ္တိ မျိုးကို မွေးဖွားပေးစေခဲ့သည်။


ဂျူး ဝတ္ထုများသည် ဗဟုသုတ အများအပြားကို မပေးပါ။ ပေးရန်လည်း မဟုတ်ပါ။ သို့သော် ဂျူးသည် သူ့ဝတ္ထု များထဲတွင် သုတေသနဆန်ဆန် လေ့လာဆန်းစစ်မှုများဖြင့် နယ်ပယ်ဝန်းကျင်တို့၏ အနေအထားကို ခြယ်မှုန်း ပြသွားသည်။ ဂျူးသည် မိန်းမတို့၏ စိတ်ကို နားလည်သည်။ ယောက်ျားများ၏ စိတ်ကို ချည်းကပ်နိုင်သည်။ ခံစားချက်များကို သရုပ်ဖော်၊ သင်္ကေတပြုရာ၌ ဂျူးက အင်မတန် ကျွမ်းကျင်သည်။

အမျိုးသမီးများ၏ အငုံ့စိတ်ကို တွန်းလှန်ဖြိုဖျက်ပေးနိုင်ခဲ့သည်။ ဂျူးဝတ္ထုများကြောင့် ခံစားချက်များ သိမ်မွေ့ရင့် သန်လာသော အမျိုးသမီးများ ရှိပါလိမ့်မည်။ သူတို့၏ ခံစားချက်၊ အမြင်များကို ရုပ်လုံးပေါ်အောင် ဂျူးက ကျေးဇူးပြုနိုင်ခဲ့သည်။

ဂျူးသည် လူကိုလည်း ရေးသည်။ စိတ်ကိုလည်း ရေးသည်။ ခံစားချက်ကိုလည်း ရေးသည်။ အမြင်ယူဆချက်ကို လည်း ရေးသည်။ ချည်းကပ်ပုံများကိုလည်း ဖွဲ့သည်။ အဖြစ်သနှစ်ကိုလည်း ရေးသည်။ ဆန္ဒဇောကို လည်း တွန်း၍ ရေးတတ်သည်။ အမျိုးသမီးလူ့အသိုင်းအဝိုင်းအလွှာမှာ၊ ချီတုံချတုံဖြစ်နေသာ ကိစ္စရပ်များကို ပြတ်သား ရှင်းလင်းအောင် မီးထွန်းပြနိုင်ခဲ့သည်။

ဂျူးမှာ ကလောင်တစ်ချောင်းသာ ပိုင်ဆိုင်သည်။ သို့သော် ထိုကလောင်တစ်ချောင်းနှင့် အရွေ့တစ်ခုကို တွန်းနိုင် ခဲ့သည်။ ဂျူးသည် ကလောင်ကို တရားသေ ဆုပ်ကိုင်သော ဝါဒီ မဟုတ်။ ကလောင်ကို လွတ်လပ်စွာ ကိုင်တွယ် သူဖြစ်သည်။ ဂျူးအပေါ် ဝေဖန်မှုများရှိခဲ့ပါသည်။ ဂျူးအပေါ် ထိုးနှက်မှုများ ရှိခဲ့ပါသည်။ သို့သော် ဂျူးမှာ ခိုင်မာ တည်ကြည်သည်။ သူဖန်တီးသော ဇာတ်ကောင်တို့၏ အဖြစ်သနစ်တို့ကို ကောင်းစွာ ကိုင်တွယ် စီရင်နိုင်သော ကလောင်ရှင်ဖြစ်သည်။
ဂျူးကို အမျိုးသားယောက်ျားတစ်ချို့က မလိုမုန်းထားပါလိမ့်မည်။ မည်သို့ပင် ဆိုစေ၊ ဂျူးမှာ မယိုင်မလဲ ဖြောင့် ဖြောင့် လျှောက်နေဆဲဖြစ်သည်။

၁၉၉၄ ခုနှစ်၊ ပေဖူးလွှာ မဂ္ဂဇင်းမှာ ဝင်းငြိမ်းက ဂျူးကို အင်တာဗျူးလုပ်သည်။ “ရာဇဝင်ထဲမှာ မောင့်ကို ထားရစ်ခဲ့ သူ နှင့်တွေ့ဆုံခြင်း” ဆိုပြီး ခေါင်းစဉ်တပ်သည်။ သည်အထဲမှာ၊ ဂျူးက အခုလို ပြောသည်။ “ကျွန်မကတော့၊ ကန့်သတ်ချက် တစ်ခုတည်းအတွင်းမှာ ကိုယ့်ကိုယ်ကို ဘောင်မခတ်ချင်ဘူး။ ပရိတ်သတ်က စည်းတားပေးရင် လည်း တချိန်ချိန်မှာ ဖောက်ထွက်ဖို့၊ ကြိုးစားမိမှာပါပဲ…၊ ကျွန်မက လွတ်လပ်မှုကို မြတ်နိုးတယ်လေ…”။

ဂျူးသည် လွတ်လပ်သော အမျိုးသမီးဖြစ်ပါသည်။ အခုအချိန်ထိလည်း လွတ်လပ်နေသေးသည်။ နောင်လည်း လွတ်လပ်အုံးမည် ဖြစ်ပါသည်။ ဂျူး၏ ကလောင်ကလည်း လွတ်လပ်သည်။ ဂျူး၏ ရေးသားပုံများ အနည်းငယ် ပြောင်းလဲသွားတာ ရှိပါသည်။ ဂျူး၏ ရေးဖွဲ့ပုံများ ပြောင်းလဲသွားတာ ရှိပါသည်။ ဂျူးရေးသော စာအုပ်များမှာ ဝတ္ထုမဟုတ်သော စာအုပ်များလည်း ပါဝင်လာပါသည်။ ဂျူးသည် ဝတ္ထုတိုများကိုလည်း ရေးသည်။ ဝတ္ထုလုံးချင်း များကိုလည်း ရေးသည်။ သဘာဝ ပတ်ဝန်းကျင်အကြောင်းလည်း ရေးသည်။ သဘာဝအကြောင်းရေးသည်။ တောတောင် သဘာဝများလည်းပါ သည်။ ယဉ်ကျေးမှုအကြောင်း၊ လူမှုအလွှာတန်းစားတို့အကြောင်း….၊ ဆင်းရဲခြင်း ချမ်းသာခြင်းအကြောင်း။ ရုပ်ရှင်များအကြောင်း၊ ဂန္တဝင်များအကြောင်း….။


ဂျူးသည် ယခုထက်ထိ ရင်ခုန်ဖွယ် အမျိုးသမီးတစ်ယောက်ဖြစ်နေသေးသည်။ ဂျူး၏ ကလောင်မှာ ရှင်သန်နေ သည်။ တစ်နေရာတည်းတွင် ကျောက်ချမနေ။ ဂျူးသည် ကိုယ်ရည်ကိုယ်သွေးအရရော၊ စာပေအရပါ ဖောက်ထွက်နိုင်စွမ်း မြင့်မားသူဖြစ်သည်။

တချို့ယောက်ျားများသည်၊ ဂျူးက မိန်းမများကို မြှောက်ပေးသော ကလောင်ရှင်ဟု မြင်ကြသည်။ အနှီအမျိုး သားတို့ ဘယ်သို့၊ ဘယ်ပုံ ရှုမြင်သည် မသိ။ ဂျူးဖတ်သော အမျိုးသမီးများသည် ၎င်းတို့ ရှေ့တွင်၊ ကန့်လန့်နိုင် လှသောကြောင့်လည်းဖြစ်ပါလိမ့်မည်။

ဂျူးသည် သူ့ဝတ္ထုထဲတွင် သူ့ကိုယ်သူ ထိုးထည့်ထားတာလည်း ရှိသည်။ သို့သော် သိမ်မွေ့စွာ ပေါင်းစပ်နိုင်ပါ သည်။ ဂျူးသည် မိန်းမတို့ သဘာဝဗီဇအရ ဖြစ်တည်ခံစားမှုများကို ဖမ်းယူနိုင်သည်။ ထိုတွေ့ရှိချက်များဖြင့် လှပ စွာ ရေးသားပုံဖော်သည်။ လူအများသည် ဝတ္ထုထဲတွင် သူတို့ကိုယ်သူတို့ တွေ့ရှိသွားသလို ခံစားလိုက်ရသည်။ ထို့နောက် စွဲလမ်းသွားသည်။ ဂျူးဝတ္ထုများကို အငမ်းမရဖတ်ကြသည်။ သူတို့ စရိုက်များသည် ပြောင်းလဲလာ သည်။ ဂျူးဇာတ်ကောင်များက ဩဇာရှိသည်။ သူတို့သည် ဖတ်သူကို လှုပ်နိုးနိုင်စွမ်း မြင့်မားလွန်းလှသည်။

ဂျူးသည် ဆရာဝန် တစ်ယောက်ဖြစ်ပါသည်။ စာရေးဆရာတစ်ယောက်လည်းဖြစ်သည်။ သဘာဝပတ်ဝန်းကျင် ရေးရာ တက်ကြွလှုပ်ရှားသူလည်းဖြစ်သည်။ မ,ဝါဒီ တစ်ယောက်လည်းဖြစ်ပါသည်။ မြန်မာပြည်၏ ဆီမွန်ဒီဗူးဗွား လည်းဖြစ်သည်။ ဒီဗူးဗွားနဘေးမှာ ယန်းပေါ့လ်ဆာ့် ရှိသော်လည်း….၊ ဂျူးမှာ…..

ဂျူးသည် မဟာပုရိသာဝါဒီတို့နှင့် ယှဉ်ဖက်တုပြိုင် မလုပ်ပါ။ သိမ်မွေ့စွာ တော်လှန်ပါသည်။ လှပသော နည်းနာ ဖြင့် သင်္ကေတပြုပါသည်။ ကျနော်တို့ ယောက်ျားတွေက ဂျူးကို ကျေးဇူးတင်သင့်ပါသည်။ ဂျူးကို မဖတ်သော ယောက်ျားများလည်း ကျေးဇူးတင်သင့်ပါသည်။ အကြောင်းမှာ၊ ဂျူးကြောင့် ကျနော်တို့ ယောက်ျားများသည် တော်သော၊ ထက်သော၊ ထူးချွန်၍ ကိုယ့်အားကိုယ်ကိုးသော၊ ကိုယ့်ကိုယ်ကို ယုံကြည်မှု ရှိသော၊ အမှီအခိုကင်း သော အမျိုးသမီးများကို မျှော်လင့်ဖို့ အခွင့်အလမ်းကို ရခဲ့သည်သာ ဖြစ်သည်။ သည်နေရာတွင် ယောက်ျားများသည် မိန်းမများအပေါ် မျှော်လင့်တတ်သလား….လို့ မေးလျှင် မရှက်တမ်း ဝန်ခံရပါလိမ့်မည်။ ဟုတ်ပါသည်။ မျှော်လင့်ပါသည်။ ယောက်ျား မိန်းမ ဟူသည်၊ လိင်အရ ကွဲပြာခြင်းသာ ရှိပါသည်။ အားလုံးဟာ လူသားများဖြစ်ခြင်းကြောင့် ဖြစ်ပါသည်။ ဂျူးစာပေ၏ လွှမ်းမိုးမှုကြောင့် မဟုတ်ဘဲ၊ ပင်ကိုယ်ဗီဇကြောင့် ထူးချွန်ထက်မြက်သော အမျိုးသမီးများလည်း အများအပြားရှိပါလိမ့်မည်။ ဤအချက်ကို မပြောလိုပါ။

သို့သော် ဂျူး၏ လွှမ်းမိုးမှုသည်၊ အမျိုးသမီးထုအပေါ်မှာ မသိလိုက်၊ မသိဖာသာနှင့် ဩဇာကြီးမားနေခဲ့ပြီ။ ဂျူး လို ကလောင်မျိုး မြန်မာစာပေလောကမှာ ရှိခြင်းကြောင့် ဂုဏ်ယူပါသည်။ တန်ဖိုးထားမိပါသည်။ ဂျူးကိုယ်တိုင် သူ့ဘဝအပေါ် ရိုက်ခတ်ချက်များအပေါ် ကောင်းစွာ ထုတ်လုပ်ဖြန့်ချိနိုင်ခြင်းကြောင့်လည်း အားကျအတုယူရ ပါသည်။

ဂျူးဝတ္ထုများထဲတွင် ဂျူး၏ အဇ္ဈတများပါပါသည်။ ဤအချက်သည် အပြစ်ဆိုဖွယ်ရာ မဟုတ်ပါ။ စာရေးဆရာ သည် သူရေးသော စာထဲတွင် သူ့အဇ္ဈတကို ထိုးထည့် ဖော်ညွှန်းခြင်းသည် သဘာဝသာ ဖြစ်ပါသည်။ ဂျူး၏ စရိုက်သည် မာရည်ကျောရည်ရှိသော အသွင်အပြင် ရှိခဲ့ပါလိမ့်မည်။ သို့သော် ဂျူးသည် နှစ်လိုဖွယ်ရှိသော အမျိုးသမီးဖြစ်ပါသည်။

ဂျူးဝတ္ထုများကို ဖတ်ကြည့်လျှင် မာန ဆိုသော သင်္ကေတကို မကြာမကြာတွေ့ရပါလိမ့်မည်။ ချစ်ခင်ကြင်နာ၊ ယုယခြင်း၊ မြတ်နိုးတန်ဖိုးထားခြင်းဟူသော အမှတ်သရုပ်များလည်း တွေ့ရပါလိမ့်မည်။ ဂျူးသည် မာနကို ချစ်စရာကောင်းအောင် ဖွဲ့တတ်သော ကလောင်ရှင်ဖြစ်ပါသည်။

ဂျူးအကြောင်းကို၊ ဤမျှ သည်မျှနှင့် တော်လိုက်ပါမည်။ ။
အမှားပါလျှင် ခွင့်လွှတ်နားလည်ကြပါကုန်…။

မင်းသေ့
၀ း ၀၄ အေအမ်
၁၅ ဩဂုတ် ၂၀၁၈ ။

Janaka Previous post သာသနာ့ အသက်
Aung San Suu Kyi' Sketch Next post အောင်ဆန်းစုကြည် (သို့မဟုတ်) သူ